Drejtori i KDI-së, Ismet Kryeziu, ka vlerësuar se dërgimi i mesazheve nga zyra e kryeministrit për studentët duke i njoftuar për ndarjen e 100 eurove, janë Abuzimi dhe keqshfrytëzimi i taksave publike.
Ai ka bërë me dije se dërgimi i mesazheve të tilla tri ditë para raundit të dytë të zgjedhjeve i ndalur me çdo standard ndërkombëtar.
Në profilin e tij në “Facebook”, Kryeziu ka shkruar se kjo ndërhyrje cenon drejtpërdrejt integritetin zgjedhor.
“Abuzimi dhe keqshfrytëzimi i taksave publike dhe postës zyrtare të Zyrës së Kryeministrit për dërgimin e mesazheve të tilla vetëm tre ditë para ditës së zgjedhjeve, është i ndaluar kategorikisht sipas standardeve demokratike vendore dhe ndërkombëtare për integritet elektoral. Kjo ndërhyrje cenon drejtpërdrejt integritetin zgjedhor dhe parimin e barazisë në zgjedhje. Zgjedhjet nuk mund të jenë të lira e të ndershme, nëse shteti përdoret si instrument elektoral”, ka shkruar Kryeziu.