Kandidati i AAK-së për kryetar të Komunës së Suharekës, Bali Muharremaj, ka reaguar pas shpifjeve dhe lajmeve të rreme që, sipas tij, po bëhen ndaj tij dhe familjes së tij në prag të zgjedhjeve.
“Suhareka është tjetër nivel. E imazhin e saj askush nuk mund ta njollos. Të gjitha kërcënimet, shpifjet dhe lajmet e rreme të cilat po bëhen ndaj meje dhe familjes time, do të kalojnë nëpër organet e drejtësisë dhe faktet do të ballafaqohen në gjykatë pas zgjedhjeve,” ka deklaruar Muharremaj.
Ai ka theksuar se familja e tij ka integritet moral, të cilin do ta mbrojë me mjete ligjore, duke theksuar se beson në institucionet e vendit dhe autoritetin e ligjit.
“Më vjen keq që po detyrohen edhe shoqatat të reagojnë publikisht ndaj shpifjeve. Duhet të ruajmë qetësinë dhe të mos ndjejmë asnjë presion,” ka shtuar ai.
Në fund, Muharremaj ka falënderuar qytetarët për mbështetjen dhe ka bërë thirrje për pjesëmarrje në zgjedhje:
“Përgjigjja më meritore për ta është VOTA. Prandaj nesër dilni dhe votoni.”