Kandidati për kryetar të Mitrovicës, Arian Tahiri, ka falënderuar qytetarët për mbështetjen dhe besimin gjatë garës zgjedhore.
Tahiri nëpërmjet një shkrimi në Facebook, ka shprehur mirënjohjen për të gjithë qytetarët dhe theksoi se pjesëmarrja në procesin demokratik ishte një privilegj dhe një dëshmi e pjekurisë politike dhe kulturës qytetare të Mitrovicës.
Ai uroi kundërkandidatin për fitoren, duke i dëshiruar suksese në punën për qytetin. Tahiri gjithashtu premtoi se do të vazhdojë të kontribuojë në shërbim të Mitrovicës dhe qytetarëve, me përkushtim, ndershmëri dhe dashuri për qytetin.
“Rezultati i zgjedhjeve është shprehje e vullnetit tuaj dhe ky vullnet do ta ketë gjithmonë respektin tim,” theksoi Tahiri.
Komisioni Qendror i Zgjedhjeve ka përditësuar sot të dhënat, duke përfunduar kështu numërimi i votave në Mitrovicë.
Sipas rezultateve, nga 33,359 vota, Faton Peci i Lëvizjes Vetëvendosje ka marrë 53,47% ose 17,837 vota dhe Arian Tahiri i Partisë Demokratike të Kosovës, ka marrë 46,53% ose 15,522 vota.