Agjencia e Ushqimit dhe Veterinarisë të Kosovës (AUV) ka njoftuar se është zbuluar prania e bakterit salmonela spp, në një ngarkesë me mish pule të importuar nga Rumania.
Sipas njoftimit të AUV-së, rasti është identifikuar pas një kontrolli të kryer në bazë të njoftimit nga Sistemi i Paralajmërimit të Shpejtë për Ushqim (RASFF). Gjatë inspektimeve, është konstatuar se në sasinë prej 27.7 kilogramë mish pule nga një llot i caktuar, është gjetur prania e bakterit.
Menjëherë pas konstatimit, AUV-i ka ndërmarrë të gjitha veprimet e nevojshme ligjore, duke asgjësuar të gjithë sasinë e ndotur në përputhje me procedurat dhe standardet e sigurisë ushqimore.