Kryetari i dorëhequr i Partisë Demokratike të Kosovës, Memli Krasniqi, ka deklaruar se ish-krerët e partisë, Hashim Thaçi dhe Kadri Veseli, nuk kanë ndikim në vendimet apo udhëheqjen e PDK-së.
I pyetur nëse është konsultuar me ta përpara se të merrte vendimin për dorëheqje, Krasniqi tha se nuk ka pasur diskutime me ish-udhëheqësit, duke theksuar se ata nuk ndërhyjnë në punët e partisë.
“Përkundër miteve që kryesisht krijojnë kundërshtarët tanë politikë, zoti Thaçi e zoti Veseli as nuk janë përzi e as nuk përzihen në udhëheqjen apo vendimet e PDK-së. Këto kanë qenë deklarata dashakeqe, kështu që jo, nuk kam pasur diskutime me ta. Sepse ka qenë shumë vështirë t’i shohim e t’i kontaktojmë,” tha Krasniqi.
Ai shtoi se i njeh mirë të dy, pasi ka bashkëpunuar gjatë me ta, dhe beson se vendimi i tij për dorëheqje nuk do t’i befasojë.
“Kam qenë nënkryetar edhe i Thaçit edhe i Veselit për kohë të gjatë, kemi bashkëpunuar shumë. Nuk besoj dhe shpresoj që s’ka me i befasu. Jam i bindur që edhe sot kur e marrin vesh këtë vendim, ata e dinë që ky është vendim i duhur,” u shpreh Krasniqi.