Profesori amerikan Daniel Serwer ka deklaruar se do të dëshironte të shihte më shumë presion ndërkombëtar ndaj Serbisë, në mënyrë që ajo të ndalë shfrytëzimin e situatës në veri të Kosovës për qëllime të dëmshme.
Megjithatë, ai thekson se një presion i tillë vështirë se do të sjellë ndryshime të mëdha.
Sipas Serwerit, presidenti serb Aleksandar Vuçiq ka zgjedhur të mos jetë lideri që do të normalizojë marrëdhëniet me Kosovën e pavarur dhe aq më pak të njohë sovranitetin dhe integritetin territorial të saj.
“Për këtë do të nevojitet një president tjetër në Beograd”, ka thënë ai për Kallxo.
Duke folur për Kosovën, Serwer vlerëson se Bashkimi Evropian duhet të shtojë presionin që vendi të përqendrohet në integrimin e komunitetit serb dhe trajtimin e tyre të barabartë.
“Nuk njoh shumë kosovarë shqiptarë që nuk e kuptojnë sa e rëndësishme është kjo, por ta bësh në praktikë është shumë më e vështirë sesa ta thuash”, ka deklaruar ai.
Sa i përket ndryshimeve gjeopolitike globale, Serwer thotë se Kosova dhe Serbia aktualisht janë shumë poshtë në listën e prioriteteve të SHBA-së dhe BE-së.
“Nëse do të bëhet ndonjë përparim, do të duhen njerëz në Beograd dhe në Prishtinë që e dëshirojnë atë”, ka theksuar ai.