Gani Geci ka bërë të ditur se zgjedhjet e jashtëzakonshme do të mbahen më 28 dhjetor 2025 dhe se fushata e kandidatëve të LDK-së në këtë zonë do të nisë simbolikisht nga Kulla e Bajraktarit të Llaushës, nën udhëheqjen e Fadil Gecit, kandidatit për deputet nga radhët e LDK-së.
Në reagimin e tij, Geci u shpreh se kjo fushatë do të jetë e vendosur kundër, siç i quajti ai, “bandave komuniste të PDK-së dhe LVV-së”, të cilat sipas tij vijnë nga “i njëjti brum politik, me emrin LPK”.
Ai theksoi se data e zgjedhjeve përkon me ardhjen e mërgimtarëve dhe u bëri thirrje atyre për mbështetje maksimale për Fadil Gecin dhe familjen Geci.
Geci garantoi se asnjëherë nuk do të hiqet dorë nga Flamuri Dardan dhe ai Kombëtar duke nënvizuar se angazhimi i tyre politik mbetet i lidhur fort me programin e djathtë të LDK-së dhe me rrugën politike të Presidentit historik, Ibrahim Rugova.
Sipas tij, fushata që nis në Llaushë synon të rikthejë orientimin rugovian dhe të forcojë vizionin shtetformues të LDK-së në këto zgjedhje vendimtare.