Ministri në detyrë i Financave, Hekuran Murati, përmes një postimi në profilin e tij në ‘facebook’, ka thënë se gjatë një takimi që ka pasur me disa zyrtarë të BE-së në Tiranë, e ka pasur shumë të vështirë që t’ua shpjegiojë atyre se si opozita kosovare s’e ka votuar Planin e Rritjes së BE-së.
Për këtë Muratit i ka reaguar ish-deputetja e LDK-së, Doarsa Kica-Xhelili, duke i shtruar disa pyetje Muratit.
Kica-Xhelili e ka pyetur Muratin nëse iu ka treguar atyre që e mban pozitën ministrore edhe pse Supremja ka konstatuar që s’ka të drejtë, se si krenohen kur e shkelin Kushtetutën dhe se si sulmojnë gjykatat kur nxjerrin vendime që s’iu konvenojnë.
Postimi i plotë i ish-deputetes së LDk-së.
Dëgjojeni bre!
A i tregove atyre që mban pozite ministrore edhepse Gjykata Supreme të ka thënë që s’ke të drejtë?
A i tregove që krenoheni kur shkelni Kushtetutën?
A i tregove që gjykatat dhe prokurorinë e sulmoni kur ju hetojnë, por i citoni kur marrin vendime në favor tuajin?
A i tregove që mundoheni të krijoni komisione parlamentare pa formuar qeverinë, pavarësisht që komisionet s’mund të formohen pa u përcaktuar pozita dhe opozita?
A i tregove që mbi 40 seanca i keni mbajtur në insistim për votim të fshehtë në shpërputhje me Kushtetutën?
A i tregove që 8 muaj keni insistuar që keni numra, për t’u dëshmuar DY herë që nuk i keni? E keni mundur të mos gënjeni, me ç’rast do të shkonim menjëherë në zgjedhje, e tashmë do t’a kishe një qeveri legjitime që do t’i votonte të gjitha këto?
Sepse po t’ia thoje këto, jo vetëm që do ta kuptonin pse nuk u votua, por gjëja e vetme e pakapshme do të mbesje ti me qeverinë ilegjitime të cilës i takon.