Kandidati për deputet nga Lëvizja Vetëvendosje dhe ish-ministri i Shëndetësisë, Arben Vitia, ka bërë të ditur se Klinika e Nefrologjisë në QKUK është pajisur me shërbime të reja dhe aparaturë moderne, duke shënuar një hap të rëndësishëm për avancimin e shëndetësisë publike në Kosovë.
Sipas Vitisë, për herë të parë në vend është siguruar aparatura për plazmaferezë, një procedurë jetike për pastrimin e plazmës së gjakut nga substancat e dëmshme, e cila deri më tani është realizuar vetëm jashtë Kosovës, me kosto rreth 3,000 euro për një seancë. Po ashtu, Klinika është pajisur me aparaturë diagnostike me eko dhe sonda për biopsi të veshkës, shërbim që më herët u kushtonte pacientëve deri në 1,000 euro jashtë vendit.
Në Klinikën e Nefrologjisë është vendosur edhe mikroskop modern për ekzaminimin e urinës, duke rritur saktësinë diagnostike dhe cilësinë e shërbimeve mjekësore. Pajisjet janë tashmë funksionale, ndërsa paralelisht po zhvillohet trajnimi i stafit shëndetësor.
Vitia ka theksuar se nga viti i ardhshëm këto shërbime do të ofrohen në kuadër të sistemit publik shëndetësor, duke lehtësuar barrën financiare për qytetarët dhe duke garantuar kujdes më cilësor për pacientët.
#MinistriaShëndetësisë
#QKUK
#KlinikaNefrologjisë
#ArbenVitia
#LVV