Gjatë kësaj jave, vendi ynë do të mbetet nën ndikimin e kushteve të qëndrueshme atmosferike, ndërsa gradualisht pritet shtrirja e masave më të ngrohta ajrore me origjinë nga Afrika Veriore. Megjithatë, pas depërtimit të masave të ftohta polare të dielën, ndikimi i tyre do të vazhdojë të jetë i pranishëm edhe gjatë ditës së hënë.
Në këto rrethana, dita e hënë u karakterizua me diell dhe vranësira të pjesshme, ndërsa temperaturat mbeten në vlera negative pothuajse në pjesën dërrmuese të territorit.
Të martën, pas një mëngjesi me acar dhe me mundësi për ndonjë reshje të dobët bore, gjatë ditës temperaturat do të kalojnë në vlera pozitive, ndërsa moti do të jetë me vranësira dhe intervale me diell.
Nga dita e mërkurë deri të premten, parashikohet mot kryesisht me diell, megjithatë nuk përjashtohet mundësia e krijimit të kushteve për mjegull, veçanërisht në orët e mëngjesit.
Në fundjavë pritet shtim i vranësirave dhe mundësi për ndonjë reshje të izoluar, kryesisht në formë shiu.
Era do të fryjë nga drejtime të ndryshme dhe herë pas here, lokalisht, pritet të jetë mjaft e fuqishme, sidomos në rajonin e Gjakovës, me shpejtësi prej 15–52 km/h.
Temperaturat minimale do të lëvizin nga -11 deri në 2°C, ndërsa ato maksimale nga -3 deri në 10°C.