Gazeta Sinjali mëson ekskluzivisht se në kuadër të hetimeve për falsifikim të rezultatit të votimit, Prokuroria e Shtetit ka caktuar masën e ndalimit prej 48 orësh ndaj një numri komisionerësh zgjedhorë, të dyshuar për manipulim të procesit të numërimit të votave në zgjedhjet parlamentare të 28 dhjetorit 2025.
Rasti ka të bëjë me incidentin e ndodhur më 23.01.2026, rreth orës 08:30, në Malishevë, ku pas urdhëresës së Prokurorit të Shtetit, Sektori Rajonal i Hetimeve – DRP Gjakovë ka intervistuar gjithsej 59 persona, të gjithë në cilësinë e komisionerëve zgjedhorë.
Pas intervistimit dhe analizimit të provave, me urdhër të Prokurorit të Shtetit, 15 persona janë ndaluar për 48 orë, ndërsa të tjerët janë liruar në procedurë të rregullt.
Këta janë të ndaluarit për 48 orë: Eliona Kryeziu, Denis Zogaj, Astrit Hoxha, Albesa Krasniqi, Kastriot Paqarizi, Fatime Krasniqi, Nderim Bytyqi, Njomza Guncati, Kujtim Bytyqi, Elton Hoti, Eronë Kryeziu, Besa Mazreku, Enis Hoti, Arbër Kastrati, Nexhat Krasniqi.
Të gjithë të ndaluarit janë intervistuar në praninë e avokatëve mbrojtës, ndërsa rasti është duke u trajtuar në koordinim të plotë mes Policisë dhe Prokurorisë kompetente.
Burime të afërta me hetimin bëjnë të ditur se ky është vetëm një segment i një hetimi më të gjerë, i cili përfshin edhe rajone të tjera dhe se në ditët në vijim nuk përjashtohen masa të reja procedurale, përfshirë ndalime shtesë dhe sekuestrim të materialeve relevante.
Hetimet për falsifikim të rezultatit të votimit janë në vazhdim.