Anëtari i Kryesisë së Lidhja Demokratike e Kosovës, Muhamet Hamiti, ka ngritur shqetësime për gjendjen politike dhe institucionale të vendit në prag të shënimit të 18-vjetorit të pavarësisë së Kosova.
Në një postim publik, Hamiti thotë se qytetarët po e presin këtë përvjetor “me gëzim festën më të madhe në historinë tonë”, por, sipas tij, festimi nuk vjen pa shqetësime serioze për zhvillimet e viteve të fundit.
“Ishim dy vjet e gjysmë nën sanksione të ashpra të BE-së. Po ashtu edhe me Dialog Strategjik me SHBA-të të pezulluar nga shtatori i vitit të kaluar”, ka shkruar Hamiti, duke e lidhur këtë situatë me udhëheqjen aktuale politike të vendit.
Ai thekson se këto zhvillime kanë ndodhur gjatë mandatit të qeverisjes që doli nga zgjedhjet e 14 shkurtit 2021. “Këto ndodhën në kohën e lidershipit të vendit tonë që erdhi nga zgjedhjet nacionale të para pesë viteve”, shprehet ai.
Duke iu referuar vitit të kaluar, Hamiti e cilëson atë si një periudhë të dështuar për funksionimin e shtetit. “Viti 2025 kaloi në paralizë institucionale. Ishte vit i humbur për Kosovën”, ka deklaruar ai.
Sipas Hamitit, këto probleme kanë cenuar pozicionin ndërkombëtar të Kosovës dhe kanë ndikuar drejtpërdrejt në jetën politike dhe institucionale të vendit, pikërisht në një moment kur, siç thotë ai, Kosova do të duhej të shënonte përparim dhe konsolidim shtetëror.