Deputeti i Partisë Demokratike të Kosovës (PDK), Bedri Hamza, ka deklaruar se uron që të mos jetë çështja e presidentit, që potencialisht mund ta çojë vendin në zgjedhje, arsyeja e ngutisë së votimit të buxhetit për vitin 2026.
Hamza në seancën e ftuar për buxhetin ka gjetur një sërë mangësish, përfshirë këtu shënimin e rritjes së importit dhe rënies së eksportit, shkruan Insajderi.
“Importet në vitin 2025 kanë rritje 11,3 për qind dhe kanë arritur në 1,7 miliard. Eksportet shënojnë rënie të lehtë prej 0,2 për qind dhe kjo ka ndikuar në deficitin tregtar për vitin 2025, që e kalon shifrën prej 6 miliard eurosh. Ka rritje të eksportit të viteve paraprake dhe ka përkeqësim të deficitit tregtar”, ka deklaruar ndër të tjera Hamza.
I pari i PDK’së po ashtu ka përmendur edhe përkeqësimin e likuiditetit bankar, ku për pasojë po rriten edhe normat e interesit për kreditë familjare dhe biznesore.
“Likuiditeti në sektorin bankar po përkeqësohet. Është rritur norma e interesit në depozita, që reflekton në rritjen e normës së interesit në kredi, ku bëhen më të shtrenjta edhe për ekonomitë familjare dhe bizneset. Kemi rritje enorme të çmimit të energjisë, ujit, qumështit, mishit e të gjithë artikujve të tjerë bazë”, tha Hamza.
Më tej, ai tha se për t’u bërë paga mesatare mbi një mijë euro për sektorin publik, duhet që pagat të rriten në mbi 30 për qind.
Pos tjerash, Hamza ka përmendur edhe mos-përfshirjen e buxhetit të Komunës së Prishtinës, shumën e vogël të kompensimit të dëmeve në bujqësi, paratë e ndara për Kompleksin e Adem Jasharit.