Kosova do të luajë më 26 mars ndaj Sllovakisë në Bratislavë, në ndeshjen gjysmëfinale të plejofit për Botërorin që mbahet në SHBA, Meksikë dhe Kanada.
Futbollisti Tomas Suslov e ka komentuar ndeshjen që Sllovakia do ta luajë ndaj Kosovës.
Mesfushori i Hellas Veronas, Suslov, në një intervistë për faqen zyrtare të Federatës së Futbollit të Sllovakisë i lavdëroi futbollistët e Kosovës.
Suslov tha se Kosova do të jetë agresive ndaj Sllovakisë.
“Kosova do të jetë shumë agresive. Lojtarët e saj kanë mentalitet të fortë dhe për ta kjo është një mundësi e veçantë për t’u kualifikuar në Botëror. Prandaj pres një ndeshje të fortë dhe të barabartë, ku çdo detaj mund të bëjë diferencën”, u shpreh Suslov.
Suslov me Sllovakinë ka 40 ndeshje të luajtura dhe katër gola të shënuar.
Suslov ka qenë i lënduar që nga muaji gusht i vitit të kaluar dhe të premten e kaluar pas një kohe të gjatë u kthye në fushë dhe luajti nëntë minuta në disfatën që e pësoi Verona nga Sassuolo me rezultatin 3:0.
Ai e kishte këputur ligamentin kryqëzor të gjurit të majtë.
23-vjeçari ndeshjen e fundit me Sllovakinë e luajti më 23 mars të vitit të kaluar ndaj Sllovenisë.