Departamenti amerikan i Shtetit ka shpallur një shpërblim prej 10 milionë dollarësh për çdo informacion që çon në arrestimin e udhëheqësve të kartelit të Sinaloa, Rene Arzate García, i njohur si “La Rana” (Bretkosa), dhe vëllait të tij, Alfonso Arzate García.
Sipas njoftimit, të dy vëllezërit kanë drejtuar një fraksion të kartelit për më shumë se 15 vjet dhe janë përgjegjës për operacionet e trafikut të drogës që drejtohen në Shtetet e Bashkuara.
Këto operacione përfshijnë, veçanërisht, dërgesat e drogës së fortë fentanyl, e cila ka shkaktuar një krizë serioze shëndetësore në shumë komunitete amerikane.
Shpërblimi i shpallur nga qeveria amerikane synon të nxisë qytetarët dhe informatorët të ofrojnë të dhëna të vlefshme që mund të ndihmojnë autoritetet në arrestimin e këtyre individëve, të cilët konsiderohen si pjesë e strukturës udhëheqëse të një prej kartelëve më të fuqishëm dhe më të rrezikshëm të drogës në botë.
Autoritetet e SHBA-së theksojnë rëndësinë e bashkëpunimit ndërkombëtar për të ndalur trafikun e drogës dhe për të parandaluar pasojat e tij shkatërruese mbi shoqërinë.
Ndryshe, SHBA-ja në bashkëpunim me forcat e armatosura meksikane gjatë javës së kaluar ka vrarë udhëheqësin e kartelit tjetër të drogës, Nemesio Oseguera Cervantes, i njohur më mirë si El Mencho.