Presidentja e Kosovës, Vjosa Osmani, ka njoftuar sot përmes një dekreti zyrtar shpërndarjen e Kuvendit të Republikës, një lëvizje që pritet të prodhojë zhvillime të reja politike në vend.
Përmes një deklarate publike, e para e shtetit u shpreh e vetëdijshme për implikimet ligjore që mund të ketë ky akt, duke pranuar se vendimi i saj mund të përfundojë për interpretim në Gjykatën Kushtetuese.
Megjithatë, ajo e cilësoi këtë hap si njërën nga vendimmarrjet më të rëndësishme të mandatit të saj.
“E di që ky vendim për shpërndarjen e Kuvendit mund të kontestohet nga Gjykata Kushtetuese, mirëpo kurrë nuk kam qenë më krenare sesa për këtë vendim që po e marr”, deklaroi ajo, përcjell Insajderi.
Ky zhvillim vjen në një moment kritik, pasi e enjtja e 5 marsit shënonte afatin e fundit ligjor kur Kuvendi i Kosovës duhej të niste procedurat për zgjedhjen e kreut të ri të shtetit.
Mandati pesëvjeçar i presidentes Osmani përfundon zyrtarisht më 4 prill, dhe dështimi i legjislativit për të iniciuar procesin e zgjedhjes duket se ka shtyrë presidenten drejt këtij akti ekstrem.