Prokuroria Speciale ka bërë të ditur se ka iniciuar një rast penal lidhur me kërcënimet ndaj presidentes së vendit, Vjosa Osmani.
Sipas njoftimit zyrtar, rasti po hetohet në drejtim të veprës penale “Dhuna ndaj përfaqësuesve të lartë të Republikës së Kosovës”.
Osmani tash e disa ditë po përballet me sulme e kritika nga zyrtarë dhe mbështetës të Kurtit në rrjetet sociale.
Njoftimi i plotë:
Prishtinë, 09 mars 2025 – Prokuroria Speciale e Republikës së Kosovës njofton opinionin publik, se sot ka iniciuar rast penal në lidhje me kërcënimet ndaj presidentes së Republikës së Kosovës znj.Vjosa Osmani-Sadriu, në drejtim të veprës penale “Dhuna ndaj përfaqësuesve së lartë të Republikës së Kosovës, nga neni 121 lidhur me nenin 119 paragrafi 1 , nënparagrafi 1.1 të Kodit Penal të Republikës së Kosovës”.
Në këtë rast ka autorizuar Drejtorinë për Hetimin e Krimit të Organizuar dhe Krimeve të Rënda në Policinë e Kosovës, që të ndërmarrë të gjitha veprimet e nevojshme në hetimin e plotë të këtij rasti, me qëllim të sigurisë së rendit juridik të Republikës së Kosovës, të zyrtarëve dhe qytetarëve të saj.