Një ngjarje e rëndë ka tronditur mbrëmjen e së premtes qytetin e Arezzos në Itali, ku një 30-vjeçar me origjinë shqiptare u qëllua për vdekje me armë zjarri.
Sipas raportimeve të Euronews.al, krimi ndodhi rreth orës 23:45, përpara një restoranti në qytet. Viktima është identifikuar si Gjergj Pergegaj, i cili u godit nga katër plumba. Njëri prej tyre e kapi në qafë, duke rezultuar fatal, ndërsa një tjetër plumb goditi kornizën e derës së lokalit.
Menjëherë pas ngjarjes, forcat e rendit u mobilizuan dhe nisën një operacion për kapjen e autorit. Rreth orës 02:00 të mëngjesit, autoritetet arritën të arrestojnë të dyshuarin, një 35-vjeçar shqiptar.
Trupi i pajetë i viktimës u transportua në morgun e spitalit “San Donato” në Arezzo, ku do t’i nënshtrohet ekspertizës mjeko-ligjore.
Nga hetimet e para dyshohet se bëhet fjalë për një krim pasioni. Sipas raportimeve, Pergegaj, pasi kishte përfunduar turnin e punës, ishte ndalur për të biseduar me ish-të dashurën e tij, me origjinë rumune. Në atë moment, në vendngjarje ka mbërritur partneri aktual i saj, i cili, pasi i pa së bashku, dyshohet se ka humbur kontrollin dhe ka hapur zjarr.
Hetimet për zbardhjen e plotë të rrethanave të kësaj ngjarjeje tragjike vazhdojnë.