Nënkryetari i Lidhja Demokratike e Kosovës, Lutfi Haziri, ka deklaruar në DTV Media se përbërja e re e kryesisë së partisë është përgjegjësi ekskluzive e kryetarit Lumir Abdixhiku.
Sipas Hazirit, kjo është një e drejtë që i takon Abdixhikut si mandat i deleguar nga strukturat e partisë. Ai theksoi se kryetari i LDK-së ka kompetencën e plotë për të ndërtuar ekipin e tij drejtues.
“Ky është mandat i deleguar i Abdixhikut për të pasur ekipin e tij, i cili ka ardhur si rezultat i vendimit të Kuvendit të partisë më 31 mars”, u shpreh Haziri.
Ai shtoi se vendimet e marra në këtë drejtim burojnë nga vullneti i Kuvendit të LDK-së, duke e bërë legjitime përbërjen e re të kryesisë.
Kujtojmë se Lidhja Demokratike e Kosovës ka mbajtur Kuvendin e saj më 31 mars, ku janë marrë vendime të rëndësishme për organizimin e brendshëm dhe strukturimin e udhëheqjes së partisë.