Tensionet brenda Lidhjes Demokratike të Kosovës duket se kanë arritur kulmin, duke e thelluar përçarjen mes dy figurave kryesore, Lumir Abdixhiku dhe Përparim Rama. Çështja e shumëpërfolur “Termokos” po shihet si mollë sherri që ka nxitur përplasje të forta politike brenda partisë.
Sipas burimeve të DTV Media, kreu i LDK-së, Lumir Abdixhiku, është duke shqyrtuar seriozisht mundësinë që kjo parti të tërhiqet nga qeverisja në Komunën e Prishtinës. Ky zhvillim, nëse konfirmohet, pritet të ketë ndikim të drejtpërdrejtë në stabilitetin e qeverisjes lokale dhe raportet ndërpartiake në kryeqytet.
Në anën tjetër, brenda kampit të kundërt raportohet për pakënaqësi të thella ndaj lidershipit aktual. Burime të afërta me këtë grupim bëjnë të ditur se po shtohen zërat që kërkojnë thirrjen e një kuvendi të jashtëzakonshëm të LDK-së, me qëllim shkarkimin e Abdixhikut nga posti i kryetarit të LDK-së.
Kjo situatë mund të shënojë një pikë kthese për LDK-në, e cila kohët e fundit është përballur me sfida të brendshme dhe rënie të unitetit partiak. Përplasjet rreth çështjeve konkrete si Termokos po shndërrohen në konflikt më të gjerë për drejtimin dhe të ardhmen e partisë.
Deri më tani nuk ka një reagim zyrtar nga Abdixhiku apo strukturat e LDK-së lidhur me këto zhvillime, ndërsa mbetet të shihet nëse këto tensione do të kulmojnë me vendime konkrete në ditët në vijim.