Departamenti Amerikan i Shtetit, përmes Zyrës kundër Terrorizmit, ka shprehur mirënjohje të lartë për vendimin e institucioneve të Kosovës për të shpallur Korpusin e Gardës Revolucionare Islamike të Iranit (IRGC) si organizatë terroriste.
Në një reagim zyrtar, DASH theksoi rëndësinë e këtij hapi në luftën globale kundër terrorizmit.
“Ne e falënderojmë Kosovën për qëndrimin kundër terrorizmit dhe për përcaktimin e IRGC-së si një organizatë terroriste”, thuhet në deklaratën e DASH-it.
Ky falënderim vjen pasi Qeveria e Kosovës, në mbledhjen e mbajtur më 20 prill në Prishtinë, mori vendimin zyrtar për ta futur këtë organizatë iraniane në listën e grupeve terroriste.
Sipas Kryeministrit Albin Kurti, ky vendim tregon përkushtimin e Kosovës për sigurinë ndërkombëtare.
“Përmes këtij vendimi, Kosova e forcon qëndrimin e saj në mbrojtjen e sigurisë ndërkombëtare, vlerave demokratike dhe të drejtave të njeriut”, kishte deklaruar Kurti, duke shtuar se ky është një rreshtim i qartë krah aleatëve strategjikë.