Deputeti i PDK-së, Eman Rrahmani, pati disa pyetje radhazi sot ndaj kryeministrit Albin Kurti, duke kërkuar sqarime të prera lidhur me politikat e qeverisë për familjen dhe ndryshimet ligjore që prekin kodin civil.
Gjatë seancës parlamentare, Rrahmani ka kërkuar të dijë pozicionin zyrtar të ekzekutivit përballë kërkesave të komunitetit LGBT dhe rregullave të reja për ndryshimin e gjinisë.
Rrahmani ka listuar disa raste specifike, duke vënë në dyshim nëse koncepti tradicional i familjes po ndryshon me propozimet e reja ligjore.
“Si e shihni ju familjen, kush do ta përbëjë familjen sipas konceptit tuaj? A do të përfshini si familje edhe rastet që sipas ligjit që keni propozuar për ndryshimin e gjinisë, një burrë që ka ndryshuar gjini dhe është bërë grua, ose një grua që ka ndryshuar gjininë dhe është bërë burrë a do ta njihni si familje?”, pyeti ai.
Deputeti vijoi më tej me pyetje rreth martesave të gjinisë së njëjtë dhe metodave të reja të riprodhimit.
Ai i kujtoi kryeministrit deklaratat e mëparshme për përqindjen e popullsisë me orientime të ndryshme seksuale, duke kërkuar të dijë nëse qeveria po punon për realizimin e qëllimeve të tyre.
“A do ta njihni si familje martesën e të njëjtës gjini? A do ta njihni si familje një grua që ka lindur fëmijë nga një dhurues i spermës? Ju keni deklaruar se rreth 10% e popullsisë ka orientim të tillë seksual. Pra, a do angazhoheni si Qeveri për t’i realizuar këto qëllime, pra të drejtat e këtij 10% siç e quani ju”, tha Rrahmani.