Imami i Xhamisë së Drenasit, Mulla Osman Musliu, ka reaguar ashpër ndaj deklaratës së ish-deputetit Florin Krasniqi, i cili kishte kritikuar Vetëvendosjen me fjalët: “Drenicën s’e kanë mposhtë krajla e sulltana, e po e mposhtin këta zhugana”.
Musliu tha se deklarata të tilla nuk janë dashuri për Drenicën, por përpjekje për të nxitur qytetarët kundër shtetit të Kosovës.
“Drenica nuk është as pronë private e Florin Krasniqit, as bunker emocional ku secili politikan i dështuar futet për të ndezur mllef kundër qeverisë”, ka shkruar ai.
Sipas Musliut, është e rrezikshme që historia e Drenicës të përdoret për t’i bindur qytetarët se armiku i saj është vetë shteti i Kosovës.
“Drenica kurrë nuk ka luftuar kundër Kosovës dhe shqiptarisë. Drenica gjithmonë ka luftuar për Kosovën dhe shqiptarin”, theksoi Musliu në reagimin e tij.