Komisioni Qendror i Zgjedhjeve ka bërë të ditur se deri në orën 14:00 të së hënës, 11 maj 2026, asnjë nga 27 subjektet politike që kanë aplikuar për pjesëmarrje në zgjedhjet parlamentare nuk ka dorëzuar listën e kandidatëve për deputetë.
Sipas zëdhënësit të KQZ-së, Valmir Elezi, procesi i dorëzimit të listave po zhvillohet në mënyrë online, por deri tani nuk është regjistruar asnjë aplikim i përfunduar për certifikim të kandidatëve.
Ai theksoi gjithashtu se ka përfunduar afati për njoftimin e pjesëmarrjes në zgjedhje dhe për formimin e koalicioneve. Në total, pritet që në zgjedhjet e parakohshme të 7 qershorit të marrin pjesë 27 subjekte politike, përfshirë parti, koalicione, një iniciativë qytetare dhe një kandidat të pavarur.
Pas përfundimit të procesit të certifikimit të listave, KQZ pritet të organizojë edhe shortin për renditjen e subjekteve në fletëvotim.
Zgjedhjet e 7 qershorit konsiderohen të parakohshme dhe do të përcaktojnë përbërjen e re të Kuvendit të Kosovës.