Komisioni Qendror i Zgjedhjeve njofton se më 16 maj do të organizohet tërheqja e shortit për caktimin e numrave rendorë të subjekteve politike në fletëvotimin për zgjedhjet e parakohshme parlamentare të 7 qershorit 2026.
Këtë e bëri të ditur zëdhënësi i KQZ-së, Valmir Elezi. Ai tha se tërheqja e numrave për renditjen në fletëvotim pritet të bëhet nga 27 subjekte politike.
“Pas përfundimit të periudhës zgjedhore për njoftimin e pjesëmarrjes nga partitë politike dhe formimin e koalicioneve (1–7 maj), si dhe periudhës për aplikim për certifikim nga subjektet e reja politike (2–10 maj), numri i përgjithshëm i subjekteve politike që mund të jenë pjesë e zgjedhjeve të parakohshme është 27, prej të cilave: 22 parti politike, 3 koalicione, 1 nismë qytetare dhe 1 kandidat i pavarur”, tha Elezi.
Sipas afateve të miratuara nga KQZ, fushata zgjedhore për subjektet politike dhe kandidatët për deputetë, që do të zgjasë 10 ditë e 7 orë, nuk fillon menjëherë pas tërheqjes së shortit për numrat rendorë në fletëvotim.
“Komisioni Qendror i Zgjedhjeve ka vendosur që periudha e fushatës së zgjedhjeve për subjektet politike dhe kandidatët e certifikuar të fillojë më 28 maj dhe të përfundojë në orën 06:59 të mëngjesit të datës 7 qershor 2026”, deklaroi Elezi.