25-vjeçari, Harbin Vitija, është plagosur mbrëmë vonë në Prishtinë.
Pas plagëve të marra, ai është dërguar për trajtim në Qendra Klinike Universitare e Kosovës, më saktësisht në Klinikën Intensive.
Lidhur me gjendjen e tij shëndetësore ka folur shefi i Mjekimit Intensiv, Shaqir Uka.
“Po është kryer një intervenim kirurgjik. Pacienti po vazhdon të marrë trajtimin mjekësor në njësinë e mjekimit intensiv. Gjendja e përgjithshme e pacientit është e rëndë. Ai vazhdon të qëndrojë i fjetur me barna, i kyçur për aparatura mjekësore dhe i varur nga aparaturat”, ka deklaruar Uka për media.
Detaje për rastin kanë dhënë mbrëmë edhe nga Policia e Kosovës.
Sipas zëdhënësit të Policisë për rajonin e Prishtinës, Enis Pllana, rasti është raportuar rreth orës 21:40 në rrugën “Ali Sokoli” në Prishtinë.
“Rreth orës 21:40 kemi marrë informatën për të shtëna me armë zjarri, në rrugën ‘Ali Sokoli’ në Prishtinë. Njësitet policore menjëherë kanë dalë në vendin e ngjarjes, nga ku është raportuar se një person është plagosur. Personi i plagosur, mashkull, është dërguar për trajtim mjekësor, ndërkohë policia ka nisur një hetim lidhur me rrethanat e këtij rasti”, ka deklaruar Pllana.