Një shtetas i Kosovës, 28-vjeçar, pritet të dëbohet nga Gjermania dhe të transferohet në Kosovë, pas një vendimi gjyqësor që lidhet me një aksident me fatalitet të ndodhur gjatë një gare ilegale makinash në vitin 2019.
Vendimi është marrë nga Gjykata e Lartë Administrative në North Rhine-Westphalia, e cila ka refuzuar ankesën e të dënuarit për arsye procedurale, duke e bërë vendimin për dëbim përfundimtar.
Sipas raportimeve, rasti kishte ndodhur kur ai ishte përfshirë në një garë me shpejtësi të lartë në një zonë urbane, ku për pasojë kishte humbur jetën një 43-vjeçare, nënë e dy fëmijëve.
Në vitin 2023, ai ishte dënuar me pesë vjet burgim për aksidentin, ndërsa më pas autoritetet gjermane kishin marrë vendim për mosvazhdimin e lejes së qëndrimit dhe dëbimin e tij nga vendi.
Gjykatat gjermane kanë vlerësuar se personi paraqet rrezik për kryerjen e veprave të ngjashme, ndërsa vendimi i fundit e hap rrugën për kthimin e tij në Kosovë pas vuajtjes së dënimit.