Enver Hoxhaj ka reaguar ndaj paralajmërimit për themelimin e xhandarmërisë së Kosovës, duke thënë se vetë emërtimi “xhandarmëri” është term serb dhe se koncepti, sipas tij, është i gabuar.
Në emisionin “N’Pikë” në DTV Media, Hoxhaj deklaroi se prioritet duhet të jetë përmirësimi i kushteve për policët dhe ushtarët e Kosovës, për të cilët tha se shumë prej tyre po detyrohen të mbajnë nga dy punë për të përballuar jetesën.
“Xhandarmëria është emërtim serb. Nihere është mirë me ua rregullu kushtet policëve e ushtarëve që janë tu i majt ka dy punë”, u shpreh ai gjatë intervistës.
Sipas Hoxhajt, ky term ringjall kujtime të këqija historike për qytetarët e Kosovës, duke iu referuar xhandarmërisë serbe që, sipas tij, ka ushtruar represion në të kaluarën. Ai tha se edhe vetë koncepti i krijimit të një strukture të tillë është i panevojshëm dhe i gabuar.
Deklaratat e tij vijnë pasi Xhelal Sveçla ka paralajmëruar themelimin e xhandarmërisë së Kosovës, çështje që ka nxitur debat në opinionin publik dhe politik.