Në Gjykatën Themelore në Prishtinë ka dështuar të mbahet seanca e së premtes, pasi munguan dëshmitarët Dibran Gashi, Florent Thaqi dhe Arianit Amerllahu, në rastin ku Gazmend Selimi po akuzohet për vrasje të rëndë në bashkëkryerje.
Përfaqësuesi i palës së dëmtuar, avokati Kujtim Kërveshi, njoftoi gjykatën se ka kontaktuar dëshmitarin Gashi përmes telefonit, ku i njëjti ka kërkuar që të caktohet një seancë tjetër, pasi nuk do të mund të ishte prezent, raporton “Betimi për Drejtësi”.
Tutje, kryetarja e trupit gjykues, Sulltane Hoti, e bëri të ditur se dëshmitari Thaqi ka pranuar ftesën e rregullt, mirëpo i njëjti nuk është paraqitur në seancë.
Po ashtu, lidhur me mungesën e dëshmitarit Amerllahu, gjyqtarja Hoti tha se i njëjti ka dorëzuar një letër, ku ka njoftuar gjykatën se nuk do të jetë prezent për shkak se gjendet jashtë shtetit.
Ndërsa, për dëshmitarin Fitim Krasniqi, gjyqtarja Hoti deklaroi se i njëjti është njoftuar për seancën e sotme, por gjykatës ende nuk i është kthyer fletëkthesa.
Andaj, në mungesë të kushteve ligjore, seanca e sotme u shty për një datë tjetër.
Sipas aktakuzës të ngritur me datë 14 nëntor 2024, i akuzuari Gazmend Selimi me datë 5 gusht 2022, rreth orës 23:40 në Lipjan, në bashkëkryerje me të akzuarin Muhamet Gashi, pas një mosmarrëveshje me të ndjerin D.G. dhe të dëmtuarin J.G., fillimisht e godet me një grusht në fytyrë të ndjerin D.G., ku si pasojë e kësaj ka ardh deri në vrasjen e të ndjerit nga ana e të akuzuarit Gashi, kështu që i njejti me dashje që ti privoj nga jeta të ka shtënë më armë zjarri – pistoletë në drejtim të tyre.
Tutje, sipas aktakuzës, i akuzuari Gashi, ka privuar nga jeta D.G. duke e qëlluar me një predhë në gjoks dhe me këtë rast ka vënë në rrezik jetën e personave të tjerë, të dëmtuarin J.G. duke e qëlluar me një predhë në pjesën e barkut ku i ka shkaktuar plagë të rëndë dhe A.B. duke i shkaktuar lëndime të lehta në këmbë nga predha e armës së zjarrit.
Me këtë, Selimi po akuzohet se në bashkëkryerje me të akuzuarin Gashi kanë kryer veprën penale Vrasje e rëndë nga neni 173 par. 1 pika 1.5 lidhur me nenin 31 të Kodit Penal të Republikës së Kosovës.