Rrezarta Krasniqi ka reaguar me tone të forta pas zhvillimeve të fundit brenda LDK-së, duke theksuar se partia duhet të qëndrojë mbi çdo interes individual.
Ajo thotë se kur pritjet ndërtohen mbi spektakël dhe jo mbi organizim të mirëfilltë, rezultati është i pashmangshëm dhe pa justifikime emocionale. Sipas saj, rezultati zgjedhor nga “13 në 16” është i dobët dhe nuk përfaqëson pritjet e ngritura.
Krasniqi thekson se premtimet për “bashkim të madh” nuk u reflektuan në terren, ku sipas saj u krijuan ndarje, u anashkaluan aktivistë që kanë kontribuar për dekada dhe u krijua perceptimi i pabarazisë brenda partisë.
“Në politikë nuk matesh me fotografi apo duartrokitje, por me votë,” ka theksuar ajo, duke shtuar se mungesa e rezultateve kërkon përgjegjësi.
Ajo kërkon që reforma në parti të nisë nga lidershipi dhe jo nga baza, duke kritikuar qasjen aktuale dhe mungesën e qartësisë së identitetit politik brenda LDK-së.
Sipas saj, problemi nuk qëndron te aktivistët, por te mënyra se si udhëheqja e partisë ka menaxhuar proceset dhe besimin e strukturës.
Në fund, ajo apelon për reforma rrënjësore dhe bashkim rreth vizionit, jo interesave personale, duke theksuar se vetëm një LDK e fortë mund t’i ofrojë Kosovës stabilitet dhe të ardhme të sigurt.