Dy motra kosovare humbën jetën tragjikisht në një aksident të rëndë në Gjermani, të shtunën e 20 qershorit. Erza dhe Aulona Zubaku nuk arritën t’iu bëjnë ballë plagëve që morën pas përplasjes në autostradën A5, pranë Appenweier dhe për pasojë vdiqën.
Vajzat jetonin në Zvicër me familjen e tyre, ku edhe kishin nënshtetësinë zvicerane, raporton Blick.
Mediumi zviceran tashmë ka dhënë detaje lidhur me aksidentin fatal, që mori jetën e dy mërgimtareve nga Kosova.
Sipas autoriteteve atje, Blick raporton se fillimisht, pak pas orës 11:30, pranë zonës së pushimit Renchtal, ndodhi një përplasje anësore mes dy veturave gjatë një manovre për ndërrimin e korsisë nga ajo e mesme në të majtën.
“Për shkak të shpejtësisë së lartë, të dy drejtuesit humbën kontrollin mbi automjetet e tyre, të cilat përfunduan të ndaluara në rrugë. Njëri nga të përfshirët në aksident pësoi lëndime të rënda.”, thuhet në artikullin e tyre.
Pengesat e krijuara në rrugë nga aksidenti i parë detyruan drejtuesit e automjeteve që po vinin pas të frenonin fuqishëm. Si pasojë, pranë daljes së Appenweier ndodhi një tjetër aksident i rëndë, ku u përfshinë gjithsej pesë automjete.
“Ndërsa pasagjerët dhe drejtuesit e katër prej pesë veturave nuk u lënduan, për dy gra që udhëtonin në një veturë tip Smart nuk pati mundësi shpëtimi. Ato humbën jetën në vendin e ngjarjes si pasojë e plagëve të rënda.”
Policia e Offenburgut ka konfirmuar se viktimat ishin dy shtetase zvicerane, të moshave 17 dhe 23 vjeç. Automjeti me të cilin ato udhëtonin ishte i regjistruar në Zvicër.
Dëmi material i shkaktuar nga aksidentet vlerësohet të jetë mbi 100 mijë euro.