Instituti Demokratik i Kosovës ka kërkuar që lufta kundër korrupsionit në Kosovë të vendoset si prioritet, pas mbajtjes së zgjedhjeve parlamentare dhe krijimit të institucioneve të reja qeverisëse.
Në njoftimin e KDI-së, degë e Transparency International në Kosovë, bëhet thirrje që poashtu luftimi i korrupsionit duhet të udhëhiqet nga një strategji kombëtare efektive e përcjellë me resurse të nevojshme financiare.
“KDI kërkon nga institucionet që llogaridhënia dhe trasparenca në sektorin publik të përbrendësohen si standarde bazike të qeverisjes së mirë në mënyrë që të parandalohet shpërdorimi i resurseve publike, nepotizmi dhe disbalansi midis pushteteve”, thuhet në njoftim.
Ndër tjera, theksohet se në Indeksin e Përceptimit të Korrupsionit në botë “#CPI 2024 – Luftimi i korrupsionit të bëhet prioritet për institucionet e reja të dala nga zgjedhjet”, Kosova është renditur e 73-ta me 44 pikë.
“Kosova për vitin 2024 ka shënuar 44 pikë dhe është renditur e 73-ta në ranglistën botërore. Në mesin e shteteve të Ballkanit Perëndimor, ajo është renditur pas Malit të Zi dhe ka lënë pas Shqipërinë, Maqedoninë e Veriut, Serbinë dhe Bosnjë e Hercegovinën”.
Sipas KDI-së, që nga viti 2012, kur Kosova është bërë pjesë e vlerësimeve të CPI, progresi i saj ka qenë i vazhdueshëm por i ngadaltë, me gjithsej 10 pikë në 12 vitet e fundit.