Një i ri shqiptar ka humbur jetën në Itali si pasojë e një aksidenti të rëndë në vendin e punës, duke rikthyer në vëmendje shqetësimet për sigurinë në punë në rajonin e Venetos.
Viktima, 27-vjeçari Floriano Cani, banor i Gemona del Friuli, ndërroi jetë më 30 qershor në një spital në Padova, katër ditë pasi ishte plagosur rëndë gjatë një incidenti në zonën e Due Carrare.
Sipas mediave italiane, i riu ishte goditur nga një shtyllë telekomunikacioni gjatë punës, duke pësuar lëndime të rënda që rezultuan fatale, pavarësisht trajtimit intensiv mjekësor.
Menjëherë pas aksidentit, ai ishte transportuar me urgjencë me helikopter në spital, ku mjekët bënë përpjekje të vazhdueshme për ta mbajtur në jetë.
Ngjarja ka shkaktuar reagime në Itali, ku përfaqësues të sindikatave kanë kërkuar rritje të masave të sigurisë në vendet e punës, duke theksuar se rastet fatale po shtohen shqetësueshëm.
Autoritetet italiane po vijojnë hetimet për të sqaruar rrethanat e plota të aksidentit.