Qeveria e Kosovës në mbledhjen e sotme ka marrë vendim për rritjen e pensioneve për 20 përqind për familjet e kategorive të dala nga lufta.
Kryeministri i vendit, Albin Kurti tha se rritja prej 20 përqind e pensioneve mbi shumën aktuale do të bëhet për familjet e dëshmorëve, invalidëve, veteranëve, pjesëtarët e UÇK-së, viktimat e dhunës seksuale dhe viktimat civile.
“Ashtu siç e patëm bërë njoftimin në tetor të vitit të kaluar, gjatë janarit, sot edhe edhe zyrtarisht do të aprovohet rritja prej 20 përqind e pensioneve mbi shumën aktuale për familjet e dëshmorëve, invalidëve, veteranëve, pjesëtarët e UÇK-së, viktimat e dhunës seksuale dhe viktimat civile”, tha Kurti.
Xhavit Jashari, përfaqësues i Shoqatës së Familjeve të Dëshmorëve të UÇK-së, ka kritikuar ashpër rritjen prej 20% të pensioneve për familjet e dëshmorëve, duke e quajtur të pamjaftueshme dhe ofenduese.
Sipas Jasharit, kjo rritje nuk reflekton inflacionin dhe është një mashtrim.
“Aspak e mjaftueshme, 20% me rritë pensionin a e din ky kryeministër me kalkuluar sa është inflacioni, kjo nuk është ngritje dhe është fyerje për familjet e dëshmorëve. Mashtrimi i radhës është që dy dëshmorë mund ta gëzojnë këtë ngritje vetëm ata prind që janë gjallë dhe dëshmorë që nuk kanë qenë të martuar është e ulët dhe nuk e bënë jetën e dinjitetshëm për këtë kategori”, shprehet ai.
Ai ka theksuar se kjo është një vazhdimësi e politikave të kryeministrit, të cilat, sipas tij, kanë goditur vazhdimisht luftën e UÇK-së dhe të drejtat e këtyre kategorive.
Jashari ka deklaruar se kryeministri Albin Kurti gjatë katër viteve mandat ka qenë anti-UÇK.
“Së pari i ka goditur duke i hequr nga paga minimale pas kësaj goditje të rëndë është e pamjaftueshme kjo ngritje për këto kategori. Kjo është fushatë e kryeministrit që donë të bëjë me këtë kategori se ky vazhdimisht ka qenë kryeministri më anti-UÇK vazhdimisht ka goditur luftën e UCK e këto kategori në të gjitha mënyrat”, deklaroi Jashari.