Ish-komandanti i Ushtrisë Çlirimtare të Kosovës, Daut Haradinaj, ka reaguar ashpër ndaj deklaratës së ministres serbe Snezhana Paunoviç, e cila u shpreh publikisht se po të ishte në vend të Sllobodan Millosheviçit në vitin 1998, do ta spastronte etnikisht Kosovën.
Përmes një postimi në Facebook, Haradinaj ka deklaruar se kjo gjuhë e trashëguar nga epoka e Millosheviçit vetëm sa e rrit gatishmërinë e shqiptarëve për ta mbrojtur lirinë dhe shtetësinë e tyre.
“Kosova kurrë nuk ka qenë zemra e Serbisë. Kosova ka qenë dhe mbetet fundi i Serbisë dhe kapitullimi i saj. Kjo gjuhë millosheviçiane vetëm sa e forcon vetëdijen tonë kombëtare si një komb i lirë dhe i gatshëm ta mbrojë këtë shtet dhe këtë liri nga mendësia gjenocidale, e cila shihet që është bartur brez pas brezi”, ka shkruar Haradinaj.
Ai e ka shkruar se “Kosova është zemra e secilit shqiptar”.
Deklarata e ministres serbe Paunoviç ka nxitur reagime të shumta e të njëpasnjëshme nga figura të njohura politike dhe publike në Kosovë dhe Shqipëri, të cilët e kanë dënuar këtë qasje si dëshmi të faktit se mendësia e viteve të ’90-ta vazhdon të jetë e pranishme në strukturat qeverisëse të Beogradit.