Këngëtari dhe humanisti Labinot Tahiri ka bërë të ditur se do të ofrojë mbështetje të vazhdueshme financiare për djalin e artistit të ndjerë Shpat Kasapi.
Përmes një postimi në rrjetet sociale, Labi ka treguar se nga çdo dasmë dhe mbrëmje muzikore që do të zhvillojë në vazhdim, do të ndajë nga 150 euro për Roelin, djalin e Shpatit.
Ai ka thënë se ky vendim vjen si një formë respekti për mikun dhe kolegun e tij, duke theksuar se ndihma për familjen e Shpatit ka nisur edhe më herët, por tashmë do të jetë një angazhim i vazhdueshëm.
“Për sa kohë Zoti ma jep mundësinë të punoj, nga çdo mbrëmje vjetore-muzikore dhe dasmë do t’i ndaj nga 150 euro për Roelin”, ka shkruar Tahiri.
Këngëtari u ka dërguar mesazh mbështetjeje familjarëve të Shpat Kasapit, duke thënë se ata nuk do të jenë vetëm dhe se kolegët e artistit duhet ta shndërrojnë përkrahjen në vepra konkrete.
Tahiri gjithashtu ka bërë thirrje për solidaritet edhe nga pjesëtarët e tjerë të estradës, duke theksuar se kjo është një mënyrë për të nderuar kujtimin e këngëtarit të ndjerë.