Boksieri shqiptar Kristian Prenga do të ngjitet sonte në ring për përballjen më të rëndësishme të karrierës së tij, ku në Xheda të Arabisë Saudite do të përballet me ish-kampionin e botës në peshat e rënda, Anthony Joshua.
Përveç peshës së madhe sportive, ky duel pritet t’u sjellë të dy boksierëve edhe përfitime të konsiderueshme financiare.
Sipas raportimeve të mediave britanike, fondi i përgjithshëm i pagesave për këtë përballje vlerësohet në rreth pesë milionë funte.
Nga kjo shumë, Joshua pritet të përfitojë afërsisht katër milionë funte, ndërsa Prenga rreth një milion funte. Megjithatë, shifrat nuk janë konfirmuar zyrtarisht nga organizatorët e meçit.
Për boksierin shqiptar, ky pritet të jetë honorari më i madh i fituar deri më tani gjatë karrierës së tij profesionale.
Promotori amerikan Lou DiBella ka konfirmuar se Prenga do të shpërblehet me një shumë të konsiderueshme, duke theksuar se pagesa është shumëfish më e lartë se çdo honorar i mëparshëm i tij.
Të ardhurat e dy boksierëve mund të rriten edhe më tej përmes marrëveshjeve të marketingut dhe përfitimeve të tjera komerciale.
Për Prengën, përballja me Joshuan përfaqëson jo vetëm sfidën më të madhe sportive të karrierës, por edhe një hap të rëndësishëm financiar.