Autoritetet në Dubai kanë prezantuar një program të ri për të nxitur turizmin, duke ofruar shpërblime për banorët që ftojnë miq ose familjarë nga jashtë për të vizituar qytetin.
Nisma, e quajtur “Një Ftesë në Dubai”, u mundëson qytetarëve dhe banorëve mbi 18 vjeç që posedojnë dokumente të vlefshme të Emirateve të Bashkuara Arabe të nominojnë deri në tre vizitorë.
Personat e ftuar mund të përfitojnë paketa të ndryshme turistike, përfshirë akomodim në hotele, oferta në restorante dhe shërbime të tjera, ndërsa ata që i ftojnë mund të shpërblehen me benefite që arrijnë deri në 816 dollarë.
Programi është pjesë e strategjisë së Dubait për të rritur numrin e vizitorëve, pas rënies së turizmit të shkaktuar nga tensionet e sigurisë në rajon dhe ndërprerjet e përkohshme të fluturimeve.
Përveç kësaj nisme, autoritetet kanë ndërmarrë edhe masa të tjera për ta bërë destinacionin më tërheqës, duke ulur disa tarifa që lidhen me sektorin e hotelerisë dhe turizmit, në përpjekje për ta rikthyer Dubain në krye të destinacioneve më të vizituara në botë.