Shqipëria do të përdorë dronë inteligjentë të prodhuar në vend për mbrojtjen e hapësirës ajrore gjatë Samitit të NATO-s që do të zhvillohet në Tiranë, ka bërë të ditur kryeministri Edi Rama.
Deklarata e Ramës u bë gjatë ceremonisë së dorëzimit të 40 mjeteve taktike të prodhuara nga kompania shqiptare Timak, në bashkëpunim me kompaninë shtetërore KAYO.
Kryeministri tha se qeveria ka porositur gjithashtu edhe një sistem të sofistikuar të mbrojtjes kundërajrore, i cili, sipas tij, pritet të jetë së shpejti në dispozicion të Shqipërisë.
“Siç e kemi premtuar, mbrojtja e qiellit në samitin e NATO-s, ku do të jetë edhe Presidenti i Shteteve të Bashkuara që e dini vetë ju se si mbrohet nga qielli e nga toka e nga Marsi e nga Hëna, mbrojtja e qiellit do të bëhet me dronë superinteligjentë të prodhuar këtu në Shqipëri, “Made in Albania”.
Ashtu si kundër tanimë jemi gati, kemi bërë edhe porosinë edhe për mbrojtjen më të sofistikuar kundërajrore, të cilën do ta ketë shumë shpejt edhe Shqipëria”, tha Rama.