Kryetari i Federatës Pan-Shqiptare të Amerikës “VATRA”, Dr. Elmi Berisha, i ka dërguar një letër presidentit të Shteteve të Bashkuara të Amerikës, Donald J. Trump, duke i kërkuar angazhim të drejtpërdrejtë diplomatik lidhur me procesin gjyqësor ndaj ish-udhëheqësve të Ushtrisë Çlirimtare të Kosovës në Dhomat e Specializuara në Hagë.
Në letrën drejtuar presidentit amerikan, Berisha e ka cilësuar procesin ndaj ish-krerëve të UÇK-së si të motivuar politikisht, duke paralajmëruar se ai mund ta rishkruajë historinë e luftës çlirimtare të Kosovës dhe ta dëmtojë një prej aleatëve më të rëndësishëm të Shteteve të Bashkuara në Ballkan.
Sipas tij, lufta në Kosovë nuk ishte një konflikt ndërmjet dy palëve të barabarta, por një fushatë sistematike e spastrimit etnik e regjimit të Slobodan Millosheviqit ndaj popullsisë shqiptare.
Berisha ka theksuar se Ushtria Çlirimtare e Kosovës u krijua si forcë mbrojtëse, me qëllim që ta ndalonte shfarosjen dhe dëbimin e shqiptarëve të Kosovës nga shtëpitë e tyre.
Në letër përmenden mbi 15 mijë civilë shqiptarë të vrarë, rreth 25 mijë viktima të dhunës seksuale gjatë luftës dhe më shumë se një milion persona të zhvendosur.
Sipas kreut të VATRA-s, kriminalizimi i drejtuesve të UÇK-së cenon kujtesën e viktimave, sakrificën e popullit të Kosovës dhe drejtësinë historike për atë që ka ndodhur gjatë luftës.
Berisha ka rikujtuar gjithashtu lidhjen e ngushtë ndërmjet Kosovës dhe Shteteve të Bashkuara, duke e cilësuar Kosovën si vendin më pro-amerikan në botë.
Ai ka vlerësuar se procesi në Hagë e dobëson këtë partneritet strategjik dhe dërgon mesazhin se aleatët e SHBA-së mund të lihen në mëshirën e tribunaleve ndërkombëtare, të cilat, sipas tij, nuk pasqyrojnë vlerat amerikane të drejtësisë dhe sovranitetit.
Në letër vlerësohet edhe roli i Donald Trumpit në Ballkan, veçanërisht Marrëveshja e Uashingtonit e vitit 2020 dhe njohja e Kosovës nga Izraeli.
Berisha ka pretenduar se Serbia dhe Rusia po e shfrytëzojnë procesin gjyqësor në Hagë për propagandë kundër shtetësisë së Kosovës dhe ndikimit amerikan në rajon.
Duke iu referuar afrimit të vendimit përfundimtar të Dhomave të Specializuara, kreu i VATRA-s i ka kërkuar presidentit Trump që ta përdorë ndikimin diplomatik të Shteteve të Bashkuara për rishikimin e mandatit të kësaj gjykate.
Ai ka kërkuar gjithashtu që t’i jepet fund, siç e ka cilësuar, tejkalimit të kompetencave të Dhomave të Specializuara dhe që SHBA-ja ta mbështesë lirimin e Hashim Thaçit, Kadri Veselit, Jakup Krasniqit dhe Rexhep Selimit.
Në përfundim të letrës, Berisha ka theksuar se mbrojtja e atdheut nga gjenocidi nuk duhet të konsiderohet kurrë krim, ndërsa e ka falënderuar presidentin Trump për mbështetjen e vazhdueshme ndaj popullit të Kosovës.
