Gazeta e njohur britanike The Guardian ka raportuar për incidentin e djeshëm në Kuvendin e Kosovës, ku deputetja e Aleancës, Time Kadrijaj, hodhi vezë në drejtim të kryeministrit në detyrë, Albin Kurti.
Incidenti ndodhi pasi Kurti kërkoi sërish ndërprerjen e seancës konstituive, pa propozuar emrin e kandidatit për kryetar të Kuvendit. Ai tha se nevojitet më shumë kohë për negociata lidhur me zgjedhjen e presidentit të ardhshëm.
Sipas raportimit të The Guardian, Kadrijaj nxori vezët nga çanta e saj dhe ia hodhi Kurtit, ndërsa bërtiste: “Turp, turp!”
Gazeta britanike shkruan se Kosova ka mbetur në një ngërç politik prej gati dy vitesh, duke iu referuar krizës së vazhdueshme institucionale.
The Guardian ka rikujtuar edhe një incident të ngjashëm të vitit 2015, kur “viktimë” e vezëve ishte kryeministri i atëhershëm i Kosovës, Isa Mustafa.
Në atë kohë, Mustafa ishte qëlluar me vezë gjatë një seance në Kuvend, në një prej rasteve më të bujshme të protestës politike brenda institucionit.