Presidenti ukrainas, Volodymyr Zelensky, tha se Evropa duhet të jetë gjithashtu në tryezën e bisedimeve për t’i dhënë fund luftës midis Rusisë dhe Ukrainës.
Zelensky deklaroi se nuk mendonte se fakti që presidenti amerikan Donald Trump foli fillimisht të mërkurën me presidentin rus, Vladimir Putin, dhe më pas me të, flet shumë për prioritetet amerikane, por gjithashtu vuri në dukje se ishte “e pakëndshme”, raporton Reuters.
Ai tha se ai dhe Trump nuk diskutuan anëtarësimin e mundshëm të Ukrainës në NATO, duke shtuar se ai “e di se SHBA nuk dëshiron që Ukraina të jetë anëtare”. Ai theksoi se Ukraina nuk do të pranonte asnjë marrëveshje që Moska dhe Uashingtoni do të arrinin pa Kievin. Zelensky shtoi se ai nuk diskutoi me Trump mundësinë e mbajtjes së zgjedhjeve presidenciale në Ukrainë.
Ai dhe Trump folën me telefon të mërkurën për përfundimin e luftës në Ukrainë, pasi Trump kishte folur më parë në telefon me Putinin. Zelensky theksoi se ata diskutuan mundësitë për arritjen e paqes dhe e cilësoi bisedën si të rëndësishme.
“Presidenti Trump ndau detaje nga biseda e tij me Putinin. Ne ramë dakord të qëndrojmë në kontakt dhe të planifikojmë takime”, tha Zelensky.
Ai shtoi se është biseduar për përgatitjen e një dokumenti të ri për sigurinë, bashkëpunimin ekonomik dhe partneritetin.