Një shofer është gjobitur me 150 euro dhe një pikë negative pasi lejoi një pasagjer të nxirrte trupin nga automjeti në lëvizje, në rrugën “Brigada 123” në Suharekë.
Rasti është evidentuar pas një raportimi nga qytetarët përmes aplikacionit “Lajmëro Policinë”. Sipas Policisë së Kosovës, raportimi është bërë më 15 gusht 2026, ndërsa kundërvajtësi është identifikuar më 18 gusht.
Policia ka bërë të ditur se në raportimin e pranuar përmes aplikacionit mobil shihej një qytetar duke dalë mbi automjet përmes xhamit të kulmit, derisa automjeti ishte në rrugën “Brigada 123” në Suharekë.
Pas identifikimit të kundërvajtësit, atij i është shqiptuar vendimi për kundërvajtje, ndërsa për shkeljen e kryer është dënuar me 150 euro gjobë dhe një pikë negative.
Policia e Kosovës apelon tek të gjithë pjesëmarrësit në komunikacion që të respektojnë rregullat e trafikut, të shmangin shpejtësinë e lartë dhe sjelljet e rrezikshme, me qëllim të ruajtjes së jetës dhe sigurisë së qytetarëve.