Presidenti i Serbisë, Aleksandar Vuçiq, ka deklaruar se është i shqetësuar për marshin e paralajmëruar për më 12 shtator në Prishtinë, në mbështetje të ish-presidentit Hashim Thaçi dhe ish-krerëve të tjerë të Ushtrisë Çlirimtare të Kosovës.
Gjatë një vizite në veri të Serbisë, Vuçiq pretendoi se organizatorët presin lirimin e Thaçit dhe se kanë paralajmëruar dhunë nëse kjo nuk ndodh.
“Jam veçanërisht i shqetësuar sepse shqiptarët kanë caktuar një ‘Marsh për Liri’ të madh më 12 shtator, duke pritur që Thaçi të lirohet. Paralajmërojnë dhunë nëse kjo nuk ndodh”, deklaroi ai.
Presidenti serb tha se do të presë deri më 16 shtator dhe më pas do të flasë për ato që i cilësoi si veprime të komunitetit ndërkombëtar ndaj Serbisë gjatë viteve të fundit.
Ai shtoi se për këtë çështje do të ketë mundësi të flasë edhe në Asamblenë e Përgjithshme të Kombeve të Bashkuara, e cila mbahet më vonë gjatë këtij muaji.