Në Gjilan ka nisur aktiviteti simbolik “Ora e Pritjes”, e cila numëron mbrapsht drejt 16 shtatorit, në pritje të drejtësisë dhe lirimit të Hashim Thaçit, Kadri Veselit, Jakup Krasniqit dhe Rexhep Selimit.
Në këtë aktivitet morën pjesë Eliza Hoxha nga platforma qytetare “Liria Ka Emër”, përfaqësues politikë, aktivistë dhe qytetarë të shumtë.
Pas nisjes së orës, në qytet u shpalos edhe një baner gjigant me mbishkrimin: “Në emër të popullit, shpallini TË PAFAJSHËM!”.
Përmes këtij aktiviteti u përcoll mesazhi se Kosova po pret drejtësi, liri dhe kthimin në atdhe të ish-krerëve të Ushtrisë Çlirimtare të Kosovës, të cilët po gjykohen në Hagë.
Aktivitetet e platformës “Liria Ka Emër” do të vazhdojnë me “Marshin për Liri”, që do të mbahet më 12 shtator, duke filluar nga ora 14:00, në sheshin “Skënderbeu” në Prishtinë. Qytetarët janë ftuar t’i bashkohen marshit në mbështetje të ish-krerëve të UÇK-së.