Deputetja e Partisë Demokratike të Kosovës (PDK), Ganimete Musliu, ka reaguar pas zhvillimeve të sotme në Kuvendin e Kosovës, duke akuzuar Lëvizjen Vetëvendosje (VV) se është përgjegjëse për bllokadën institucionale në vend.
Musliu ka thënë se për tre muaj VV-ja ka bërë, sipas saj, propagandë, duke fajësuar të tjerët për bllokadën dhe duke ua atribuar atyre dështimin e saj.
“Mashtuesve u doli boja!”, ka shkruar Musliu në një postim në rrjetet sociale.
Ajo ka pretenduar se zhvillimet e sotme në Kuvend kanë zbuluar atë që e ka cilësuar si “skemën bllokuese” të VV-së.
“Tre muaj me radhë VV-ja bëri propagandë, shpiku fajtorë për bllokadë dhe ua hodhi të tjerëve dështimin e vet. Sot, para gjithë Kosovës, e zbuluan vetë skemën e tyre bllokuese”, ka deklaruar Musliu.
Sipas saj, situata e krijuar tashmë nuk përbën vetëm dështim politik, por edhe “hipokrizi politike”.
“Sot propaganda u përplas me realitetin dhe VV-ja mbeti pa alibi”, ka shkruar deputetja e PDK-së.
Në fund, Musliu ka akuzuar VV-në se me veprimet e sotme ka dëshmuar se është përgjegjëse për bllokimin e institucioneve.
“VV firmosi sot se ata janë bllokuesit e institucioneve dhe pengmarrësit e shtetit”, ka përfunduar ajo.