Shefi i Bashkëpunimit të BE-së në Kosovë, Hubert Perr, ka theksuar rëndësinë e investimeve të qëndrueshme në infrastrukturë në kuadër të përgatitjeve për Lojërat Mesdhetare “Prishtina 2030”.
Duke folur në forumin “Road to 2030: Kosovo on the Mediterranean Stage”, Perr tha se infrastruktura e ndërtuar për Lojërat duhet të jetë e qasshme, e sigurt, e qëndrueshme dhe e menaxhuar siç duhet, në mënyrë që të vazhdojë t’u shërbejë qytetarëve edhe pas përfundimit të tyre.
“Lojërat do të zgjasin disa javë, por ajo që Kosova ndërton për to mund ta formësojë Kosovën për dekada”, tha Perr.
Sipas tij, “Prishtina 2030” mund të rrisë profilin ndërkombëtar të Kosovës, të krijojë mundësi të reja ekonomike dhe të përshpejtojë investimet në infrastrukturë moderne e të qëndrueshme.
Perr shtoi se BE-ja mund të kontribuojë me ekspertizë dhe investime, ndërsa koordinimi ndërinstitucional dhe partneritetet e fuqishme do të jenë thelbësore për të maksimizuar përfitimet afatgjata për Kosovën.