68-vjeçari që dyshohet se vrau me thikë bashkëshorten e tij 58-vjeçare në banesën e tyre në zonën e Zogut të Zi në Tiranë, është vetëdorëzuar në polici.
Hysni Patushi është paraqitur në Komisariatin nr. 5, ku është shoqëruar nga shërbimet policore, raporton Top Channel, përcjell Sinjali.
Ngjarja ndodhi gjatë paradites, ndërsa viktima, Lumturie Patushi, u gjet pa shenja jete në banesë, me plagë në pjesën e kraharorit.
Dëshmitar i momentit kritik dyshohet se ka qenë një prej nipërve të çiftit, 14-vjeçari A. J., i cili ndodhej në banesë bashkë me vëllezërit e tij të vegjël. Sipas deklarimeve paraprake, ai kishte parë gjyshërit duke debatuar dhe, pasi ishte larguar për pak çaste, kur ishte kthyer kishte parë gjyshin duke goditur me thikë gjyshen.
Pas ngjarjes, Patushi ishte larguar nga banesa, ndërsa policia kishte nisur kërkimet për lokalizimin e tij, deri në vetëdorëzimin e tij në komisariat.
Grupi hetimor po punon për zbardhjen e plotë të rrethanave dhe motivit të ngjarjes.