Në dokumentet publike më të fundit të paraqitura pranë Dhomave të Specializuara të Kosovës në Hagë, përfaqësuesi i viktimave ka prezantuar argumente tronditëse mbi gjendjen e sistemit ligjor në Kosovë, me qëllim që procedura e dëmshpërblimit për viktimat të mos transferohet në gjykatat civile të Kosovës, por të vendoset e të ekzekutohet direkt nga vetë Gjykata Speciale.
Sipas parashtresës zyrtare të dorëzuar në kuadër të rastit ndaj ish-krerëve të UÇK-së (KSC-BC-2020-06), përfaqësuesi i viktimave u është referuar gjetjeve të ekspertëve ku renditen një varg e metash serioze me të cilat përballet sistemi i drejtësisë në Kosovë. Në veçanti, në paragrafin 18 të këtij dokumenti, theksohet ekzistenca e mundshme e një niveli të caktuar korrupsioni dhe ndërhyrjeje brenda sistemit ligjor të Kosovës, si dhe mungesa e strukturave efikase të llogaridhënies për gjyqësorin,.
“Ekzistenca e mundshme e një niveli të caktuar korrupsioni dhe ndërhyrjeje brenda sistemit ligjor të Kosovës dhe mungesa e strukturave efikase të llogaridhënies për gjyqësorin; (ii) kohëzgjatja e procedurave civile; (iii) problemet e mundshme lidhur me ekzekutimin e vendimeve të gjykatave të Kosovës kundër pasurive që ndodhen në territorin e një vendi që nuk ka marrëveshje për bashkëpunim gjyqësor apo lidhje diplomatike me Kosovën; (iv) fakti se fondet ekzistuese për ofrimin e ndihmës juridike mund të mos kenë burime të mjaftueshme për të garantuar ofrimin e vazhdueshëm të ndihmës juridike; dhe (v) pasiguria lidhur me zbatimin e afateve të parashkrimit, nëse ka të tilla, për pretendimet civile të ngritura nga viktimat e krimeve të luftës”, thuhet në referencën ku arsyetohet pse të hollat duhet të ekzekutohen direkt në Gjykatën e Hagës.
Mbi bazën e këtyre gjetjeve, Mbrojtja e Viktimave i ka kërkuar trupit gjykues që të miratojë këto vëzhgime dhe të mos i udhëzojë viktimat të kërkojnë dëmshpërblim nëpërmjet gjykatave civile të Kosovës, por kjo e drejtë t’u njihet dhe t’u realizohet drejtpërdrejt brenda procesit që po zhvillohet në Dhomat e Specializuara në Hagë.
Shkresa e Zyrës për Pjesëmarrjen e Viktimave është bërë publike një javë pasi që Trupi Gjykues dënoi me 81 vite burg në total Hashim Thaçin, Kadri Veselin, Rexhep Selimin e Jakup Krasniqin.
Parashtrimi i plotë në dispozicion vetëm në gjuhën angleze: