Protestat kundër aktgjykimit të Gjykatës Speciale ndaj ish-krerëve të Ushtrisë Çlirimtare të Kosovës do të vazhdojnë edhe sot në disa qytete të Evropës, ndërsa diaspora shqiptare pritet të dalë në rrugë për të shprehur kundërshtimin ndaj vendimit të Dhomave të Specializuara në Hagë.
Tubime janë paralajmëruar në Ulm, Frankfurt dhe Hamburg të Gjermanisë, si dhe në Kansalaistori të Helsinkit në Finlandë.
Në Hamburg protesta nis në orën 16:00, në Frankfurt në orën 17:00, ndërsa në Ulm në orën 17:30.
Organizatorët i kanë paraqitur këto tubime si shprehje të kundërshtimit ndaj aktgjykimit dënues ndaj ish-krerëve të UÇK-së.
Ndërkohë, protestat do të vazhdojnë edhe në Prishtinë. Sonte, nga ora 21:00, qytetarët pritet të mblidhen sërish në sheshin “Skënderbeu”, për natën e 11-të radhazi, nën moton “Jo në emrin tim”.
Protestat në kryeqytet kanë nisur pas aktgjykimit të Dhomave të Specializuara në Hagë ndaj Hashim Thaçit, Kadri Veselit, Rexhep Selimit dhe Jakup Krasniqit.